Saskian 0 produktu daukazu/dituzu.
Azken zubian zehar, Lauaxeta Ikastolako 1. Batxilergoko ikasleek esperientzia paregabea bizi izan dute, Frantzia eta Alemaniako ikasleekin batera. Erasmus+ programaren baitan garatutako nazioarteko proiektu honek helburu du kontzentrazio esparruetan sortutako musika berreskuratzea, eta biziraupenerako sormenaren indarra azpimarratzea.
Lehen fase honetan, ikasleek Gernika bisitatu dute, gerraren izugarrikeriaren ikur bihurtua, eta Mauleko Gurseko kontzentrazio esparrua, historian leku esanguratsua.
Gurseko esparrua: euskaldunen esparrua
Gurseko esparrua, “euskaldunen esparrua” izenez ere ezaguna, Frantziako kontzentrazio esparru nagusietako bat izan zen Bigarren Mundu Gerran. Han milaka errefuxiatu bildu zituzten, horietako asko Euskal Herritik ihesi zihoazen emakume eta gizonak. Baldintza latzen aurrean, askok artea eta musika bilakatu zituzten duintasunaren eta gizatasunaren babes.
Ikasleek lekukotasun bizigarriak entzuteko aukera izan dute eta Gurseko aztarnak oinez ezagutuz, sufrimenduaren erdian bizitzari eta edertasunari eutsi zieten pertsonen ausardia sentitu dute. Esparruaren harresien artean sortutako doinuak berriro entzungo dira, memoria eta omenaldiaren ekintza gisa.
Bigarren fasea: Alemania, 2025eko urria
Proiektuaren bigarren fasea urrian gauzatuko da, Alemaniako kontzentrazio esparruen bisitarekin. Bertan ere, giza sormenaren gaitasuna baldintzarik txarrenetan aztertzen jarraituko dute, musika hizkuntza unibertsal gisa ulertuz.
Proiektua Lauaxeta Ikastolak eta Gorka Robles Alegría tenore eta ikastolako guraso kooperatibistak gidatzen dute, historia, artea eta memoria uztartzen dituen ekimen hunkigarri honetan.
