Elkartasuna martxan: Lauaxeta Ikastolako Jostailu Azoka

Aste honetan, Lauaxeta Ikastolan Jostailu Azoka Solidarioa ospatu dugu, elkartasunez eta konpromisoz beteriko ekitaldi bat. Gure hezkuntza-komunitate osoaren inplikazioari esker, 1.086 euro bildu ditugu, eta diru hori Mundu Bakean GKE-ra bideratuko da, Senegalgo ONGFEE GKEra zehazki, proiektu berri eta ezinbesteko baterako.

GKE honek egoera ahulenean dauden emakume taldeekin egiten du lan: genero-indarkeriaren biktimak, pobrezia-arriskuan dauden familiak, adinekoak, dibertsitate funtzionala duten emakumeak, seropositiboak edo lurrik gabeko nekazariak. Gure bazkideen artean baliabide gehien behar dituena da.

Iaz, bildutako dirua Fatickeko komunitateetako dibertsitate funtzionala zuten emakumeentzat materiala erosteko erabili zen; material hori nerabeentzako konpresa berrerabilgarriak egiteko izan zen. Aurtengo egoera, ordea, ezberdina eta larria da: euriteek uztak suntsitu dituzte, eta komunitateak hazi eta elikagairik gabe geratu dira.

Horregatik, aurten bildutako dirua bi xedetara bideratuko da: alde batetik, haziak erosteko, eta bestetik, elikagaiak zuzenean erosteko emakumeen artean banatzeko.

Gainera, oporren ostean, Mundu Bakean GKEak gure ikastola bisitatuko du dirua jasotzeko eta gure ikasleei zuzenean azaltzeko haien elkartasunak nola lagunduko duen komunitate horietan.

Azkenik, saldu gabeko jostailuak ere ez dira alferrik galduko, eta Remar GKEari emango zaizkio, gure elkartasuna beste leku batzuetara ere zabaltzeko.

Eskerrik asko guztioi zuen laguntzagatik!