Etorkizuna diseinatzen: komunitate inklusibo eta jasangarriak

🌍 Lauaxeta Ikastolan, gaur egungo munduaren erronkekin konektatzen duen ikaskuntzaren aldeko apustua egiten jarraitzen dugu. Aste honetan, DBH 3. mailako ikasleak diziplinarteko proiektu batean murgilduta daude, etorkizuneko komunitate inklusiboagoak eta jasangarriagoak irudikatu, diseinatu eta eraikitzeko.

Proiektu honetan zehar, ikasleek etorkizuneko hiriak nolakoak izan behar duten aztertzen ari dira, pertsona guztien beharrei erantzuteko: haurretatik hasi eta adinekoetaraino, baita aniztasun funtzional, sozial eta kulturala kontuan hartuta ere.

Abiapuntua euren errealitatea izan da: nola bizi duten komunitatea, zein diren euren beharrak eta nola hobetu daitekeen. Hortik abiatuta, begirada zabaldu dute gizarte anitzago baterantz, non diseinu urbano eta sozialak inklusioa bermatu behar duen.

Prozesuan zehar, hainbat errealitate ezagutzeko aukera izan dute, gizarte-erakundeen testigantzen bidez. Horrek enpatia, kontzientzia soziala eta egungo erronken ulermen sakonagoa garatzen lagundu die.

Gainera, ikuspegi praktiko eta sortzailea ere landu dute: maketa urbanoen diseinutik hasi eta proposamen digitalen garapenera, hainbat diziplina uztartuz eta talde-lana, komunikazioa eta pentsamendu kritikoa bezalako konpetentziak indartuz.

Ikastea ez da soilik ezagutzak eskuratzea, mundua ulertzea eta hura eraldatzeko gai sentitzea baizik. 💡