Ekotaldea: ikasleak euren ingurua hobetzen

🌱 Ikastea ez da edukiak jasotzea bakarrik; ingurua zaindu eta errealitatearekin konektatzea ere bada. Horregatik dago, besteak beste Ekotaldea, Ikasleen Agentzietako bat, Nazioarteko Batxilergoaren (IB) markoan.

IBk ikasleak edukiak ikastera ez ezik, ekimena hartzera, pentsamendu kritikoa garatzera eta komunitatearekin konprometitzera bultzatzen ditu. Ikasleen Agentziak ikasle taldeak dira, benetako proiektuak garatzen dituztenak.

🌿 Ekotaldea Lehen Hezkuntzako ikasleek osatzen dute, eta helburua argia da: gizarte-aktibismoa, ingurumenaren zaintza eta komunitateari ekarpena.

Kanpainak antolatzen dituzte, beharrei erantzuten diete, proiektu jasangarriak bultzatzen dituzte eta gainontzeko ikastola ere inplikatzen dute.

Esperientzia hauekin, umeek ikusten dute beraiek ere aldaketa sortzaile izan daitezkeela, taldean lan eginez eta erantzukizunez jokatuz.