Saskian 0 produktu daukazu/dituzu.
❤️🩸Lauaxeta Ikastolan ikaskuntza errealitatearekin eta gizarte-konpromisoarekin lotzen duten proiektuen alde egiten jarraitzen dugu. Oraingo honetan, DBH 3. mailako ikasleak Odol Emaile proiektuan murgilduta daude; sentsibilizazioa, ikaskuntza eta ekintza uztartzen dituen ekimena.
Helburu nagusia ikasleak odol-ematearen garrantziaz kontzientziatzea da: zergatik ematen den odola, zertarako erabiltzen den eta keinu txiki batek zenbat bizitza lagun ditzakeen ulertzea.
Baina proiektua ez da formazioan amaitzen. Ikasitakoa oinarri hartuta, ikasleek eurek diseinatuko dute publizitate eta sentsibilizazio kanpaina bat, ikastolako jai egunean ahalik eta pertsona gehien odola ematera animatzeko.
Horrela, ikasleek komunikazioa, sormena eta gizarte-konpromisoa benetako egoera batean aplikatzeko aukera izango dute, komunitatean eragin zuzena duen helburu batekin.
Era berean, proiektu honek etorkizunerako kontzientzia erein nahi du: gaur ikasten dutena biharko konpromiso bihur dadin, eta etorkizunean beraiek ere odol-emaile izan daitezen ❤️
Hezkuntza, azken finean, komunitatearen ongizatearekin konprometitutako pertsonak heztea ere bada.
