Haur Hezkuntzako kirol topaketa: mugimenduaren bidez hazten

 🏊‍♀️⚽ Haur Hezkuntzako ikasleek kirol topaketa berezia bizi izan dute, eta igerilekuan zein futbol zelaian beren trebetasunak erakusteko aukera izan dute. Gozatzeko, partekatzeko, norbere burua gainditzeko eta txikitatik kirolaren balioa ezagutzen jarraitzeko eguna izan da. 💙

Lauaxeta Ikastolan, kirola hezkuntzaren funtsezko ardatz gisa ulertzen dugu. Gure helburua da haur guztiek jarduera fisikoa egiteko aukera izatea eta horrek eskaintzen dituen onurez baliatzea: osasuna, koordinazioa, autonomia, konfiantza, talde-lana eta ongizate emozionala. 🌱✨

Horregatik, 2 urtetik Batxilergora arte, kirola presente dago bai eskola-ordutegian bai eskolaz kanpoko jardueretan. Haur Hezkuntzan, jarduera fisikoa eguneroko errutinaren parte da: mugimendua, koordinazioa, psikomotrizitatea, jolasa, yoga, igeriketa, futbola eta saskibaloia pixkanaka txertatzen dira ikasleen garapen fisikoa, kognitiboa, soziala eta emozionala sustatzeko.

4 urtetik aurrera, gainera, hiruhileko bakoitzean kirol jarduera espezifiko bat praktikatzen dute —igeriketa, futbola edo saskibaloia—, kirolarekin modu ludikoan harremanetan jarriz eta oinarrizko teknika zein trebetasun motorrak garatuz. Eskolaz kanpoko ordutegian ere kirolaren aldeko apustua indartzen da, HH3ko igeriketa ikastaro trinkoarekin eta HH4 eta HH5eko kirol jarduera espezifikoekin.

Kirol topaketa hau ibilbide horren erakusgarri polita izan da: haur aktiboak, motibatuak, kirolaz gozatzen eta esperientziaren bidez ikasten. Izan ere, mugitzea, jolastea eta partekatzea ere ikastea da. 🤸‍♀️💦⚽